Baby-Led Weaning: Paano I-Encourage Ang Anak Mong Kumain Mag-Isa?

Sa isang nakaraang article namin dito sa Smart Parenting, sinabi ni Gill Rapley, isang experienced British nurse, midwife at breastfeeding counselor, ang baby-led weaning ay iyong hahayaan mo si baby na kumain ng mag-isa.

Kailan dapat simulan ang baby-led weaning?

Maaari itong simulan kapag anim na buwan na si baby at isa sa mga pinaka epektibong paraan para gawin ito ay isabay si baby sa mealtime ng buong pamilya.

“The baby sits with the family at mealtimes and joins in when she is ready, feeding herself first with her fingers and later with cutlery,” paliwanag ni Rapley.

Ibig sabihin nito, hindi mo na kailangang bigyan ng mashed, blended o pureed food ang iyong anak.

Anu-ano ang mga benefits ng baby-led weaning?

Baby-led weaning ang tamang pagkakataon para hayaan mo ang anak mo na mag-explore ng lasa, texture, kulay at amoy ng iba’t-ibang pagkain.

Isa rin itong mabisang paraan para turuan ang anak mo ng independence at confidence. Mag-iimprove din ang kanilang hand-eye coordination sa pamamagitan ng baby-led weaning.

Paano nga ba gawin ang baby-led weaning?

Importante na hayaan mong anak mo ang dumampot ng pagkain at ilapit ito sa bibig niya. Huwag mong ilalapit ang pagkain sa bibig niya at lalong huwag mo siyang pipiliting kumain kung ayaw niya.

Painumin mo rin siya ng gatas para hindi siya gutom na gutom habang nag-aaral siyang kumain ng solid foods. Mahalaga ring bigyan mo si baby ng variety ng pagkain—iyong iba-iba ang kulay, hugis, texture at flavor.

Huwag ka ring matakot na magkalat ang anak mo dahil magiging makalat talaga sila.

Sa katunayan, ilan sa mga pinaka-cute na larawan ng baby-led weaning na nakukuha namin mula sa aming Facebook group na Smart Parenting Village ay talagang makalat.

Pagkatapos kumain ni baby, siguraduhin mong walang maiiwang pagkain sa bibig niya para maiwasan siyang mabilaukan.