Mga Dapat Gawin Sa Panahon Ng Chinese New Year Para Daw Pumasok Ang Swerte

This article was updated on January 21, 2025.

Ang Chinese New Year, na tinatawag ding Lunar New Year dahil nakabase ang petsa ng selebrasyon sa mga yugto ng buwan (phases of the moon), ay pumapatak sa iba-ibang araw kada taon ngunit palagi itong sa pagitan ng January 21 at February 21. Tumatagal ng 16 na araw ang selebrasyon ng Chinese New Year mula sa Lunar New Year's eve hanggang sa Lantern Festival. Ang Lantern Festival ay tradisyon ng mga Chinese kung saan unang masasaksihan ang na bilog ang buwan o full moon ng taon.

Mga bawal tuwing Chinese New Year

Kasabay ng pagdiriwang ang mga pamahiin mula sa tradisyon ng mga Chinese bilang pampasuwerte at pag-iwas sa malas sa buong taon. Ika nga ng mga Pinoy na wala namang dugong Chinese, walang mawawala kung susundin ang mga pamahiin. 

Tamang paggupit

Kung may balak kang magpagupit ng buhok, gawin ito sa bisperas ng Chinese New Year bilang simbolo ng paghiwalay sa patapos na taon. Huwag na huwag sa araw mismo dahil mapuputol naman ang pagpasok ng magandang kapalaran sa bagong taon.

Bukod diyan, iwasan ang pagsha-shampoo ng buhok para hindi masabunan at mawala ang suwerte. Isa pang rason kung bakit may ganito ang Chinese ay dahil sa posibleng pagkakasakit.

Taglamig kasi ang panahon na ito sa China. Noong mga panahong hindi pa naiimbento ang hair dryer, madali silang nagkakasakit kapag naligo sila sa kalagitnaan ng winter. Kapag nagkasakit sa Chinese New Year, mamalasin daw ng buong taon.

Paglilinis ng bahay

Siguraduhing maglinis ng bahay sa bisperas nang matanggal lahat ng malas na dumating noong nakarang taon. Pero kailangang matapos ang paglilinis bago maghating-gabi at tuluyang pumasok ang Lunar New Year. 

Bawal na kasi ang ano mang uri ng paglilinis sa unang araw ng bagong taon — mula pagwawalis ng kalat, pagpupunas ng alikabok, at hanggang pagtatapon ng basura. Mawawalis, mapupunasan, at matatapon din daw ang suwerte.

Basahin dito kung ano ang mga lucky plants! 

Mga dapat kainin

Hindi lang masarap ang siomai at iba pang dumplings, pampasuwerte pa ang mga ito. Ang Chinese word para sa dumplings, “jiao zi." Parehas ito sa ancient word na ang ibig sabihin: pagpapalit ng bago sa luma.

Katulad din ang tradisyonal na dumplings sa hugis ng ginto na ginagamit na pera noong sinaunang panahon sa China. Kaya ang isang platong dumplings ay parang isang tumpok na ginto. Dala raw nito ay kayamanan. 

Nakasanayan na ang pagreregalo at paghahain ng tikoy dahil sagisag ito ng mahigpit na pagsasama ng mga magkakapamilya, magkakaibigan, at magkakatrabaho. Didikit din daw ang suwerte dahil sa malagkit na pagkaing ito. 

Usapang mag-asawa

Dapat daw iwasan ng mga misis na madaliin sa pagbangon ang kanilang mga mister sa unang umaga ng Chinese New Year. Dati kasi mga kalalakihan ang dominant breadwinners, paliwanag ng Chinese astrologer.

Kaya kailangan ng mga mister ng tamang pahinga bilang paghahanda sa bagong taon. Kapag nagpagising sila sa kanilang mga asawa, magiging sunod-sunuran o pushover daw sila. 

Paalala sa mga magulang

Masayang okasyon ang Chinese New Year, kaya dapat iwasan ang pagtatalo ng mag-asawa at panenermon sa anak. Kung pera ang dahilan ng pagtatalo, tandaan na malas daw ang magpautang sa unang araw ng lunar year. 

May paniniwalang kapag sinimulan ang taon na nagtatalo at nanenermon, buong taon na maghahari ang hindi pagkakaunawaan sa pamilya.

Iwasan din daw ang paggamit ng mga matatalim na bagay, gaya ng gunting, kutsilyo, at karayom. Kung may baby sa bahay, baka maging kasing liit ng mata ng karayom ang kanyang mga mata kapag gumamit si mommy ng karayom sa ano mang gawain.

Kapag kutsilyo at gunting naman ang kanyang ginamit, mapuputol daw ang yaman ng pamilya.