First Christmas Ni Baby! Ilang Paraan Para Gawin Itong Mas Masaya

Unang Pasko ba ng baby mo ngayong taon? Bukod sa pagbibigay sa kanya ng regalo, marami pang paraan para gawing mas espesyal ang kanyang unang holiday season.

Ang maganda pa rito, ano mang uumpisahan ninyong gawin ngayong taon ay maaaring maging tradisyon ng inyong pamilya hanggang sa paglaki ng iyong anak.

Narito ang ilang magagandang suggestions:

Gumawa ng family Christmas card

Hindi mo kailangang gumastos ng malaki para dito. 

Sa katunayan, may mga apps na ngayon na pwedeng i-download para doon ka makapagedit ng inyong family Christmas card.

Pwede mo itong ipadala online sa iyong mga kapamilya at kaibigan kung gusto mong mas maging environment-friendly pero pwede mo rin itong i-print sa maliliit lang na cards.

Gumawa ng baby-inspired Christmas ornaments

Pwede ninyong gamiting stamp ang kamay at paa ni baby. Siguraduhin lang na non-toxic paint ang gagamitin ninyo.

Makakabili kayo nito online. I-stamp lang ang kamay at paa ni baby sa mga plain na Christmas balls—meron ka ng ornaments na pwedeng isabit sa inyong Christmas tree.

Magkaroon ng family Christmas photoshoot

Samantalahin niyo ng mag-anak ang mga discounted packages sa mga photo studios ngayong holiday season para magkaroon kayo ng inyong pinakaunang Christmas portrait.

Pwede niyo ring gamitin ang protrait ninyo na ito para sa inyong family Christmas card.

Magsimula ng Christmas pajama tradition

Kalimitan ay Santa Claus costume ang makikita mong suot ng mga babies at maliliit na bata kapag Pasko. Para bigyan ng bagong twist ang tradition na ito, pwede pong pagsuotin ng christmas pajama ang iyong anak.

Bukod sa cute itong tignan, mas komportable din ito, lalo na para sa mga maliliit na bata.

Pwede ring ugly Christmas sweater ang ipasuot mo sa iyong anak—isang tradisyon naman mula sa mga bansang tulad ng England at Amerika.

Markahan ang kanilang taas sa ano mang bahagi ng inyong bahay

Kung mayroon kayong bahagi sa bahay na pwedeng sulatan ang pader, pwede mong umpisahan dito ang tradisyon ng pagmamarka ng taas o height ni baby.

Basta tuwing Pasko o bagong taon, mamarkahan mo ang taas ni baby. Maganda itong memorabilia at nakakatuwa itong tradisyon habang lumalaki si baby.

Ano mang paraan ng iyong pamilya para gawing mas espesyal ang Pasko ninyo ngayong taon, sana’y huwag ninyong makalimutan ang tunay na diwa ng okasyong ito.

Kayo? Anong ginagawa ninyo para mas maging espesyal ang inyong holiday season? Pwede ninyo ‘yang ibahagi sa comments section o ‘di kaya ay ikwento sa kapwa mo nanay sa aming Facebook group na Smart Parenting Village.