Bilin Ng Isang Doktor At Mom Of 4 Kapag Nagpapadighay Ng Sanggol

Fact-Checked by Ronna Capili Bonifacio

Ang article na ito ay unang naipublish noong Marso 5, 2021. Nadagdagan ito ng updates noong Agosto 30, 2024.

Isa sa mga unang dapat matutunan ng mga bagong magulang ang pagpapagdighay ng sanggol. Kapag hindi iyan nagawa nang tama, malaki ang posibleng perwisyo na maidudulot sa parehong panig ng magulang at sanggol.

Ang pagpapadighay (burping) ay isang mahalagang parte ng pagpapakain kay baby, ayon kay Dr. Madhu Desideraju ng Kids Health. Aniya, nakakatulong ang burping para mawala ang hangin na nalulunok ni baby habang dumedede siya.

May paliwanag pa si Dr. Remy Tahil, isang general practitioner at mom of 4, sa SmartParenting.com.ph. Sabi niya, ang hangin na nalulunok ng sanggol kapag dumedede mula sa suso ng ina o di kaya sa bote ay maaaring mapuno sa tiyan nito at maging kabag (colic).

Ang nangyayari tuloy, nagiging “uneasy, fussy” si baby. Kaya nahihirapan si mommy o si daddy na magpatahan o magpatulog ng anak na maligalig. Maaayos ang problema kung matatanggal ang kabag sa pamamagitan ng burping.

Gaano kadalas ang pagpapadighay ng sanggol?

Payo ng mga eksperto ng American Academy of Pediatrics (AAP) na dalasan ang pagpapa-burp kay baby. Imbes daw na hintayin mo pa na matapos dumede ang anak, kaagad siyang pagdighayin sa sandaling maging maligalig. Baka kasi kinakabag na siya kaya itigil muna ang pagpapadede.

Para raw sa breastfeeding mommy, mainam na ipa-burp muna si baby bago ilipat siya sa kabilang suso. Kung pinapadede naman ang anak gamit ang feeding bottle, sikapin na padighayin siya kada inom mula 60 hanggang 90 ml na gatas.

Mas malimit daw mangyari sa bottle-fed babies ang pagkakalunok ng hangin dahil mas mabilis rin silang dumede. Pero hindi naman nakakaligtas ang breastfed babies sa colic, lalo na kung sagana sa gatas si mommy at ganado sa pagdede si baby.

Paraan ng pagpapa-burp kay baby

May ilang paraan para mapadighay ang sanggol, depende na minsan sa tingin ng magulang na mabisa para sa kanyang anak. Base sa kanyang karanasan sa apat na anak, ganito ang ginagawa ni Dr. Tahil:

1. Maglagay ng malinis na lampin o pamunas ni baby sa iyong balikat. Baka ka kasi matapunan ka ng lungad o iyong gatas mula sa bibig ng sanggol.
2. Ipatong ang baba ni baby sa iyong balikat. Maaari mo iyang gawin habang nakaupo ko o di kaya nakatayo. Siguraduhin lang ligtas ang sanggol at pareho kayong kumportable sa posisyon ninyo.
3. Gamit ang isang kamay, suportahan ang ulo ni baby. Ang isa pang kamay ay ipangtapik nang marahan sa likuran ng anak.
4. Sa susunod na pagkakataon, subukan namang ipatong si baby sa kandungan na nakadapa at saka marahang tapikin ang kanyang likuran. Siguraduhin lang na suportahan ang kanyang ulo, at mas mataas ito kesa sa kanyang dibdib.

(Para sa visual guide, basahin dito.)

Mga Panganib ng Hindi Pagpapadighay Kay Baby

Ang pagpapadighay ng sanggol ay isang mahalagang bahagi ng kanyang pangangalaga, at may ilang panganib na kaakibat kapag ito ay hindi nagagawa nang tama o hindi nagagawa sa lahat. Narito ang ilan sa mga posibleng komplikasyon na maaaring mangyari kapag hindi napapadighay si baby:

1. Severe Colic

Ang kabag o colic ay isang kondisyon kung saan nararamdaman ni baby ang labis na pananakit ng tiyan dahil sa pagkakaroon ng maraming hangin sa loob ng kanyang tiyan. Kapag hindi natanggal ang hangin sa pamamagitan ng burping, maaaring lumala ang kabag ni baby, na magreresulta sa pagiging maligalig at palaging umiiyak na sanggol. Sa mga malalang kaso, ang kabag ay maaaring maging sanhi ng matagal at walang tigil na pag-iyak ng sanggol, na maaaring makaapekto sa kanyang pagtulog at pangkalahatang kalusugan.

2. Lungad (Spitting Up)

Kapag napuno ng hangin ang tiyan ni baby at hindi ito nailabas sa pamamagitan ng pagpapadighay, ang hangin ay maaaring magdulot ng pressure na magtutulak sa gatas o formula na kanyang kinain pabalik sa kanyang bibig. Ito ang tinatawag na lungad o spitting up. Bagamat normal ito sa mga sanggol, ang madalas na pag-lungad ay maaaring maging sanhi ng discomfort at maaaring magdulot ng iritasyon sa kanyang lalamunan.

3. Gastroesophageal Reflux Disease (GERD)

Ang GERD ay isang mas malalang kondisyon kumpara sa simpleng lungad. Kapag hindi nakapag-burp si baby at napuno ng hangin ang kanyang tiyan, maaaring tumaas ang acid mula sa kanyang tiyan patungo sa esophagus, na nagdudulot ng pangangasim at iritasyon. Ang GERD ay hindi lamang nagdudulot ng discomfort kay baby, kundi maaari rin itong magresulta sa mas seryosong problema sa kanyang kalusugan tulad ng pag-ulit-ulit na impeksyon sa lalamunan at problema sa paghinga.

Ayon sa American Academy of Pediatrics (AAP), ang hindi tamang pagpapadighay sa sanggol ay maaaring magdulot ng mga komplikasyon tulad ng kabag, GERD, at madalas na lungad. Inirerekomenda nila na regular na padighayin si baby, lalo na kapag nagpapakita siya ng senyales ng discomfort o kabag, upang maiwasan ang mga komplikasyong ito.

Bilin ng doktor

Paalala ni Dr. Desiraju na sikaping magpa-burp kada five minutes ng breastfeeding o di kaya kada 1 ounce ng bottle-feeding kung si baby ay:

• Kabagin
• Madalas maglungad
• Mayroong gastroesophageal reflux disease (GERD)
• Maligalig kapag dumedede

Kung sakali raw hindi maka-burp si baby kada ilang minuto, baguhin ang kanyang posisyon. Ulitin ang pagpapadighay ng sanggol bago bumalik sa pagpapadede. Huwag kaligtaan ang burping pagkatapos ng feeding time.

Pagkatapos magpadede, payo ni Dr. Desiraju na panatiliin ng magulang ang patayong posisyon (upright position) ng anak mula 10 hanggang 15 minutes. Tagalan nang kaunti kung may GERD si baby o kaya naglulungad.

Puwede rin daw kabagin ang sanggol dahil sa kakaiyak nito nang matagal. Kung minsan naman bigla siyang nagigising dahil sa hangin sa tiyan. Sa parehong sitwasyon, makakatulong ang burping para mapatahan si baby o di kaya makabalik sa pagtulog.

Sa pagdaan ng panahon, matutunan na ni baby na dumede nang hindi nakakalunok ng maraming hangin. Kaya huwag mag-alala kung dumalang ang pagpapadighay ng sanggol tuwing nagpapadede. Hindi na kasi siya madaling kabagin.

Frequently asked questions ukol sa pagpapadighay sa sanggol

1. Meron bang mga pagkain ng ina na nakakaapekto sa colic ng baby?

Bagamat hindi lahat ng sanggol ay naaapektuhan ng pagkain ng ina, may ilang pagkain na napatunayan na maaaring magpalala ng kabag.

May ilang pagkain na karaniwang nagdudulot ng gas, at kapag ito ay kinain ng breastfeeding mommy, maaari itong makaapekto sa gatas na kanyang ipinapasa kay baby. Ang mga pagkaing ito ay kinabibilangan ng broccoli, cauliflower, at repolyo, pati na rin ang mga beans at lentils o mga legumes na mataas sa fiber.

Ang dairy products tulad ng gatas, keso, at yogurt ay maaaring magdulot ng colic, lalo na kung may lactose intolerance si baby. Ayon sa ilang pag-aaral, ang proteins mula sa dairy na natatagpuan sa breast milk ay maaaring maging sanhi ng iritasyon sa tiyan ni baby at magdulot ng kabag.

Ang labis na pag-inom ng kape, tsaa, at soft drinks na may caffeine ay maaaring makaapekto sa pagtulog at mood ni baby. Dahil sa caffeine, maaaring maging iritable si baby at magpakita ng mga sintomas ng colic.

Ang mga prutas tulad ng orange, lemon, at grapefruit ay acidic at maaaring magdulot ng pangangasim sa tiyan ni baby. Maaari itong magresulta sa discomfort at kabag, lalo na kung sensitibo si baby sa acid.

2. Ano ang dapat gawin kung ayaw mag-burp ni baby?

Kung hindi umubra ang mga nasabing techniques sa itaas, maaaring subukan na maging banayad sa pagtapik kay baby. Ang masyadong malakas o mahina na pag-tapik ay maaaring hindi epektibo. Siguraduhing banayad pero sapat ang lakas ng iyong pag-tapik para matulungan si baby na mag-burp.

Kung ayaw pa ring mag-burp ni baby matapos ang ilang minuto, bigyan siya ng kaunting pahinga at ipatong siya sa kanyang crib o yakapin siya sa ibang posisyon nang ilang minuto. Pagkatapos ay subukan ulit siyang padighayin. Minsan, ang kaunting pahinga ay nakakatulong para makalabas ang hangin.

Ang paghawak rin kay baby sa patayong posisyon (upright position) ng ilang minuto pagkatapos magpadede ay makakatulong sa hangin na umangat at makalabas nang kusa. Minsan, habang ginagawa ito, kusa nang mag-burp si baby nang hindi na kailangang tapikin.

Basahin kung ano ang mga myths ukol sa dapat at hindi dapat kainin ng breastfeeding moms dito.