DIY Cardboard Box Bookshelf Sa Halagang P500

Sabi nga ng mga matatanda, edukasyon ang pinakamagandang regalo na maibibigay natin sa ating mga anak. Ito kasi ang sandata o hagdan na maaari nilang gamitin para marating nila ang kanilang mga pangarap—bukod pa sa sipag, determinasyon, at pasensya.  

Isa si mommy Mary Zayra Elec-Beltran sa mga nanay sa aming Facebook group na Smart Parenting Village, na naniniwala sa kahalagahan ng edukasyon at pagbabasa. Kaya naman ibinibili niya ng iba’t-ibang libro ang kanyang isang 17-month-old na anak.

At dahil dumarami na nga ang libro ng bata, naisip niyang bumili na ng bookshelf para sa mga ito. Kaya lang, hindi maikakailang may kamahalan ang mga magaganda at malalaking bookshelves. "That's why gumawa na lang ako. Less than Php500 lang nagastos ko since some of the materials that I used ay mayroon na sa bahay," kwento niya.

Ayon kay mommy, inabot din siya ng halos tatlong buwan para mabuo ang kanyang DIY bookshelf. "Nag-ipon pa ako ng mga karton," sabi niya. "Ito 'yung mga boxes na pinaglagyan ng groceries namin. Some of them hiningi ko sa mother-in-law ko. Nagagawa ko lang siya 'pag tulog na ang daughter ko sa gabi at kapag rest day ng husband ko," dagdag pa niya.

Ang mga materials lang na kilanilangang bilhin ni mommy ay strong glue o iyong heavy duty na glue, adhesive wallpaper sa kahit anong design (wood ang pinili ni mommy), at tape. Ginamit din ni mommy ang mga nagamit nang gift wrappers mula sa mga regalong natanggap ng anak niya noong Pasko.

"I suggest that if you're going to make this, dapat exact measurements lahat. Otherwise, magkakaroon ng gaps 'yung ibang parts at hindi magiging pantay," pagbabahagi niya. "Apat na layers na cardboard ang bawat part para matibay. Sinasampahan ng anak ko 'yan pero hindi nasisira," dagdag pa niya.

Maraming paraan para makatipid nang hindi mo isinasakripisyo ang kalidad ng mga gamit ng mga anak mo. Kaya naman maraming mga nanay ang naeengganyong mag-DIY dahil bukod sa marami kang natitipid, sigurado ka pang maayos ang gamit ng pamilya mo. 

Marami pang mga DIY projects ang mga nanay sa Smart Parenting Village. May mga DIY projects ka rin bang gusto mong ipagmalaki? I-share mo lang sa comments section.