Ito Ang Sikreto Ng Mom Of 4 Kung Bakit Maganang Kumain Ng Gulay Ang Mga Anak

Maraming humanga sa post sa Smart Parenting Village, ang online community ng Smart Parenting, ng isang miyembro na gamit ang pangalang Ryo Jr F. Nakazato.

Sa kanyang, aniya, kauna-unahang post, kalakip ang mga litrato ng kanyang apat na anak habang kumakain at ng mga putaheng kanyang naluto na. Tamang-tama dahil dahil Nutrition Month ang buong buwan ng July. 

Siya pala si Jeaneth Francisco, 29, nang makapalitan namin ng mensahe sa Facebook Messenger. Ang mga anak niya ay sina Ryo, 7; Yuri,  6, Satoshi, 3; at Aya, 1. Meron din silang Facebook page na Nakazato Family ang pangalan.

Kuwento ni Jeaneth sa kanyang post na isa siyang "housewife at hands-on sa mga bata." Wala rin siyang kasama sa bahay, kaya kanya ang lahat ng gawain sa bahay at sa mga bata. Kabilang rito ang pagluluto at pagpapakain sa mga anak.

Sabi pa ni Jeaneth, "Mahilig ako magluto lalo na mga gulay. Minsan hindi ko alam ano tawag sa luto ko. Kanina katatapos lang namin kumain, naghuhugas ako ng plato, 'yung 7 yrs old ko yumakap sa likod ko.

"Sabi nya.. 'Mama when I grow up and have kids, I will also give them good food like you.. I really love your food, Mama.. Thank you for cooking every day...'

"Tumango lang ako at nag thank you. Hindi ko alam na nakikita nya 'yung ginagawa ko..Feeling ko kasi ang sama kong ina dahil lagi ko sila napapagalitan, pero kahit ganon walang araw na ndi ko sila pinagluto.

"Minsan na lang kami kumain sa labas.. Wala ring birthday ang lumipas na ndi ko sila hinandaan at nag decorate sa bahay...

"Syanga po pala, lahat po sila sinanay ko sa gulay, yung 1 year old ko matakaw narin ngayon sa gulay dahil nakikita nya mga kapatid nya na kumakain..."

Tips sa pagluluto ng gulay para sa mga bata

Umani ng mga positibong komento ang post ni Jeaneth:

"Nakaka-inspire! Parang sarap na sarap 'yung mga kids sa mga food nila. Thank you for sharing! Makapagluto na nga din madalas."

"Kahit nakakapagod basta para sa anak laban lang. Good job mommy."

"Mukhang mas masarap pa po ang mga luto nyo kesa sa mga nakikita ko sa mga restaurants! Galing nyo po! Wala ako ganyang talent. Tagakain lang po talaga ako."

"Pang fine dining ang plating! Nice!"

May mga humihingi rin ng recipes at tips sa pagluluto ng gulay para sa mga bata. Halimbawa ang broccoli na, ayon nga sa isang komento, matigas ang tangkay kaya kadalasang hindi isinasama sa pagluluto.

Sagot ni Jeaneth:

1. Balatan ang tangkay ng broccoli para matanggal ang balat na matigas.

2. Steam muna ang broccoli.

3. Sa kawali, maglagay ng olive oil. Mag-gisa ng bawang, medyo "burn," o brown na ang kulay. Patayin ang apoy.

4. Ilagay sa kawali ang broccoli, pati ang konting asin at paminta.

Pagmamalaki pa ni Jeaneth, "Promise mi, ala restaurant ang lasa, half-cook lang po."

Read also: Healthy Food For Toddlers