Daphne Pills: Paano Ito Gamitin at Ang Karanasan ng Mommies Dito

Ang article na ito ay unang naipublish noong Marso 3, 2019. Nadagdagan ito ng updates noong Oktubre 26, 2023.

Kung gusto mo munang paghahandaan ang iyong pagbubuntis o ang susunod na pagbubuntis, wala kang dapat ipag-alala dahil maraming uri ng family planning methods na maaaring pagpilian. Isa na rito ang paggamit ng oral contraceptives o ang "pill". Maraming brands ang mabibili dito sa atin, pero ang pinakapopular ay ang Daphne pills, isang oral contraceptive na nagtataglay ng sangkap na lynestrenol.

Ano ang lynestrenol?

Ayon sa medical website na Practo, ang lynestrenol ay isang sintetikong progestogen na tulad ng progesterone na hormone ng babae. Ginagamit ang lynestrenol upang gamutin ang mga kondisyon na may kinalaman sa regla, na dulot ng kumplikasyon sa progesterone. Maliban dito, ginagamit din ito bilang oral contraceptive upang maiwasan ang pagbubuntis.

Ano ang ginagawa ng Daphne pills?

Ang Daphne Pill ay isang uri ng progestogen-only contraceptive pill. Pinapalapot nito ang cervical mucus (na humaharang sa sperm upang hindi makatagpo ng egg); at inaantala ang siklo ng regla at ovulation, ayon sa MIMS.

Paano gamitin ang progestogen-only contraceptive pills?

Kung tama ang paggamit ng progestogen-only contraceptive pills, maaari itong maging 99% epektibo, ayon sa National Health Service website (NHS) ng UK. Pero tandaan na kailangan ng reseta ng doktor para makabili ng Daphne pills. Mahalaga rin ang pagpapakonsulta sa ob-gyn upang malaman ang uri ng oral contraceptive na nababagay sa iyo. (Alamin dito  kung paano gumamit ng contraceptive pills.)

Hindi tulad ng ibang oral contraceptives, gaya ng hormone-free tablets, ang progestogen-only pills ay iniinom araw-araw, sa loob ng 28 araw nang walang antala. Ayon sa MIMS, maaari itong inumin sa unang araw ng regla, o anim na linggo makalipas  manganak. Kung hindi buntis, maaaring mag-umpisang uminom ng pills anumang araw, ngunit kailangan pa ring gumamit ng karagdagang contraception, gaya ng condom, sa susunod na pitong araw.

Upang maging epektibo ang pills, kailangan itong inumin araw-araw sa parehong oras hanggang maubos ang pakete. May kasamang label ng araw ang bawat pakete upang mabantayan ang inyong pag-inom. Inumin ito pagkatapos kumain, bago magsipilyo, o bago matulog para mas madali itong maalala. Ayon sa MIMS, hangga't maaari, kailangang panatilihin ang 24 oras na pagitan sa pag-inom ng mga tableta.

Pagkatapos ng 28 araw, maaari na ulit simulan ang bagong pakete ng pills kahit hindi pa nireregla. Kadalasan, dumarating ang regla dalawang araw matapos maubos ang isang pakete.

Ano ang mangyayari kung nakaligtaang uminom ng pills?

Kung nakaligtaang uminom ng pills sa takdang oras, inumin agad ito sa susunod na tatlong oras. Kung hindi pa rin ito nainom sa loob ng tatlong oras, uminom kaagad sa oras na maalala ito ngunit siguraduhing inumin ang susunod na tableta sa takdang oras, kahit pa ang ibig sabihin nito ay ang pag-inom ng dalawang tableta sa isang araw. Gayunpaman, maaaring kailanganin ang karagdagang contraception o pag-iingta panigurado sa susunod na dalawang araw.

Ligtas ba ang Daphne pills para sa nagpapasuso?

Maraming mommies ang nagbahagi sa Parent Chat ng Smart Parenting na inirekomenda ng kanilang ob-gyn ang Daphne pills dahil maaari itong inumin kahit na nagbe-breastfeed. Ayon sa MIMS, ang Daphne pill ay ligtas para sa mga breastfeeding moms.

Ayon sa NHS, may maliit na porsyento ng progestogen na maaaring maipasa sa breast milk, pero hindi ito mapanganib sa sanggol. “Infants whose mothers are taking the tablet while breastfeeding develops normally, both physically and mentally,” (Ang mga sanggol ng mga nanay na umiinom ng Daphne pills habang nagbe-breastfeed ay lumalaking normal, sa parehong pisikal at mental na aspeto) ulat ng MIMS. Hindi rin nito maaapektuhan ang suplay ng gatas ninyo.

Ano ang mga side effect ng Daphne pills?

Hindi kasiguraduhan ang reseta ng doktor na walang side effects ang pag-inom ng contraceptive pills. Isaisip na ang mga reaksyon — mabuti man o masama — ay magkakaiba para sa bawat babae. Mapapansin ito sa mga tugon ng mga mommies sa Parent Chat na matatagpuan sa ibaba. Kaya naman mahalaga ang pakikipag-ugnayan sa inyong doktor upang matiyak ang mga pills na angkop para sa inyo.

Pagdurugo o pabagu-bagong siklo ng regla

Marami sa ating Parent Chat mommies ang nagbahagi ng kanilang karanasan sa pagkakaantala ng kanilang regla. Minsan, inaabot pa raw ito ng buwan, kaya hindi nila maiwasang mag-isip kung sila ba ay buntis. Sa kabila nito, negatibo naman daw ang mga pregnancy tests.

Kung umiinom ka ng Daphne pills, maaaring hindi agad bumalik ang iyong regla kahit pa maubos na ang pakete. Kung aktibong nagbe-breastfeed, maaari rin itong maging sanhi kung bakit hindi nireregla dahil ang breastfeeding ay isang anyo ng contraception, at tinatawag itong lactational amenorrhea method. Ito ay dahil ang katawan ay gumagawa ng mga hormones  na pumpigil sa ovulation kapag ang babae ay nagbe-breastfeed. Gayunpaman, hindi ito maaaring asahan bilang tanging contraception, maliban kung natutugunan din ang ilan pang mga requirements, gaya nito.

Pagbabago sa ganang kumain

Ayon sa isang Parent Chat mom, lumakas ang kanyang gana sa pagkain noong magsimula siyang uminom ng Daphne pills, at ang isa naming mommy ay nagsabing higit siyang nagkaroon ng problema sa pagkontrol ng kaniyang timbang pagkatapos uminom nito. Ang iba ay nagsabing bumigat din ang kanilang timbang.

Acne

Ayon kay dermatologist Kristina Reyes, M.D., ang ilang birth control pills ay nakapigil acne na sanhi ng hormones, dahil napapataas nito ang estrogen na kumokontra sa mga epekto ng testosterone. Gayunpaman, Iniulat naman ng ibang Parent Chat members na ang Daphne pills ang nagpapalala sa mga sintomas ng kanilang acne.

“Sobrang dami ng pimples ko ngayon,” sabi ni Parent Chat member @tatabeng. Ayon naman sa iba, hiyang daw sila sa paggamit ng pills — “’Di naman ako nagka-pimples pero siyempre minsan talaga may occasional na pimple na lumalabas siguro due to puyat or stress,” sabi ni @dhen24.

Ang iba pang mga side effects na maaaring maranasan ng mga kababaihan ay pagkahilo, pagsusuka, pagsakit ng ulo, ibang pakiramdam sa dibdib, depresyon, at pamamantal. Ayon sa MIMS, karamihan sa mga side effects ay banayad lamang at agad ding nawawala pagkalipas ng ilang buwan ng pag-inom.

Nagdudulot ba ng mood swings ang Daphne pills?

May mangilan-ngilang oral contraceptives na maaring magdulot ng pag-iiba ng mood ng babae bilang side effect. Gayunpaman, ayon kay obstetrician-gynecologist Dr. Gemma Datu-Fulgado, marami nang pag-aaral ang nagpapatunay na walang panganib na ididinulot ang pills pagdating sa mood swings at depresyon. Gayong may mga pagkakataong maaaring tumaas ang sintomas sa depresyon, pagbabago-bago ng mood, at pagiging emosyonal, mahalaga pa ring matukoy kung kailan lumilitaw ang mga sintomas na ito.

Kasama ang depresyon bilang posibleng side effect para sa mga kababaihang umiinom ng Daphne pills, ayon sa MIMS, bagamat wala namang nabanggit ang mga mommies sa Parent Chat na naranasan nila ito. Maari ring maranasan ang side effect na ito kapag gumamit ng ibang brand ng pills.

Kung sa tingin ninyo ay nakaaapekto na ang mga side effects na ito sa inyong pang-araw-araw na buhay, mabuting makipag-ugnayan sa inyong doktor upang mahanap ang family planning method na angkop para sa inyo.

Kung ikaw ay nagbe-breastfeed at komportable naman sa pag-inom ng pill, ang Daphne pills ay pwede para sa iyo. Pero gaya ng ibang birth control methods, mayroon itong mga advantage at disadvantage. Kumonsulta sa inyong ob-gyn at humingi muna ng reseta bago subukan ang anumang oral contraceptive.

Maaari bang gumamit ng Daphne pills ang mga kababaihan na may mga problema sa puso o hypertension?

Kinakailangan kumonsulta sa doktor bago uminom ng Daphne pills ang mga babaeng dumaranas ng sumusunod na kondisyon: hika, diabetes mellitus, epilepsy, sakit sa puso, hypertension, thromboembolic disorder, kasaysayan ng depression, nakaraang ectopic pregnancy, liver dysfunction kabilang nag cholestatic jaundice o dating nakaranas ng jaundice habang buntis, at iba pang kondisyon na maaaring mapalala ng fluid retention.

Pwede bang itigil ang paggamit ng Daphne pills kahit kailan? Ano ang mga tamang hakbang para dito?

Maaari mong ihinto ang pag-inom ng pills sa gitna ng pack, o tapusin ang pack at hindi na magsimula ng bago. Wala itong pinagkaiba, ngunit mas madali malaman kung kailan magkakaroon ng regla kung tatapusin ang isang pack.

Pagkatapos huminto sa pag-inom ng birth control pills, kakailanganin ng iyong katawan ng ilang oras upang mag-adjust. Kaya’t maaaring makaranas ng spotting o pagdurugo sa pagitan ng mga regla, at maaaring hindi regular ang regla sa loob ng ilang buwan. Ito’s pansamantala lamang at babalik din ang iyong cycle kung paano ito bago ka nagsimulang uminom ng birth control pills.

Alternatibong family planning methods

Kung ayaw mo ng side effects ng pills, heto ang ibang paraan sa pagpaplano ng pamilya:

Natural:

Standard Days Method: Sa pamamaraang ito, maaaring subaybayan o bilangin ang pag-regla sa pamamagitan ng tulong ng string ng beads o App. Mabibilang dito kung kailan fertile ang isang babae at kung kailan hindi.

Lactational Amenorrhea Method (LAM): Kung ekslusibo kang nagpadede bilang isang bagong ina, maaaring napansin mo na matagal baga ka nagkaroon ng regla. Ito ay dahil ang pagpapasuso ay nakakasagabal sa pagpapalabas ng mga hormone na kailangan upang mag-ovulate. Kaya ang mga inang nagpapadede ay maliit ang posibilidad na mag–ovulate at mabuntis. Gayunpaman, nangangailangan ito ng mahigpit na mga kondisyon upang maging epektibo:

• Dapat ikaw ay isang bagong ina na eksklusibong nagpapadede ng kanyang anak
• Hindi pa bumalik ang regla simula nang manganak
• Ang bagong panganak na sanggol ay wala pang anim na buwang gulang

Basal Body Temperature (BBT): Ito ay ang temperatura ng katawan kapag nagpapahinga. Kung ikaw ay nag-oovulate, maaaring magkaroon ng bahagyang pagtaas ng temperatura ng katawan. Ayon sa Mayo Clinic, “You’ll be most fertile during the two or three days before your temperature rises. By tracking your basal body temperature each day, you may be able to predict when you’ll ovulate.”

Billings Ovulation Method (BOM): Ito ay ang pagsubaybay sa discharge araw-araw. Pinaka-fertile ang babae kung ang discharge ay nababanat at madulas, pagkatapos ng ilang araw.

Sympto-Thermal Method: Ito ay kumbinasyon ng Basal Body Temperature method at Billings Ovulation Method kung saan sinusubaybayan ang pinaka-fertile na araw ng babae sa pamamagitan ng pagmamasid ng kanyang temperatura at discharge araw-araw.

Artificial:

Injectables: Ito ay may dalawang uri: combined injectable at progestin-only. Pareho itong naglalaman ng hormone na pumipigil sa katawan sa pagpapalabas ng itlog at nagpapalapot ng mucus sa cervix, kaya’t lubos na nababawasan ang posibilidad ng pagbubuntis. Depende sa kung anong uri ang pipiliin mo, ito ay ini-inject nang isang beses sa isang buwan o isang beses bawat tatlong buwan. Maaari itong makuha sa mga health center at pribadong doktor.

Intrauterine Device (IUD): Ito ay hugis “T” at ipinapasok sa matres ng babae at maaaring tumagal hanggang 10 taon. Karamihan sa mga ito ay naglalabas din ng hormone sa kapareho sa maraming birth control pills. Kailangan din suriin ng babae kung ito ay nasa tamang posisyon minsan sa isang buwan. Maaaring magpalagay nito sa mga pribadong doktor.

Implants: Ito ay maliit at hugis posporo na ipinapasok sa ilalim ng balat ng itaas na braso ng babae, at ito ay naglalabas ng mga hormone na makakapigil din magbuntis. Maaaring tumagal ang epekto nito hanggang tatlong taon. Maaari itong makuha sa mga pribadong doktor.

Ang mga impormasyong nakalahad dito ay nagmula sa Daphne Pills: How to Use It Effectively and What Moms Say About It