8 Maaaring Dahilan Kung Bakit Umiiyak Si Baby At Anong Dapat Gawin

Fact-Checked by Ronna Capili Bonifacio

Ang article na ito ay unang naipublish noong Marso 15, 2020. Nadagdagan ito ng updates noong Mayo 30, 2024.

Walang ibang paraan para makipag-communicate sa atin ang ating mga bagong silang na sanggol kundi sa pamamagitan ng pag-iyak. Madali lang sana ito kung bawat iyak nila ay specific sa kailangan nila at madaling maintindihan ngunit madalas ay hindi.

Kaya naman para mas maging madali para sa iyo at iyong partner na malaman kung bakit umiiyak si baby, inipon namin sa isang listahan ang ilan sa mga posibleng dahilan.

8 maaaring dahilan kung bakit umiiyak si baby

Nagugutom siya

Sinabi ng pediatrician na si Dr. Paul Horowitz sa The Bump na ang pag-iyak ay isang "late sign of hunger." Para maiwasan ang pag-iyak ng anak mo dahil sa gutom, ugaliing mag-abang sa kanyang mga hunger cues. Kabilang na rito ang lip-smacking o pagsipsip ni baby sa kamay niya.

Mapapansin mo rin na humihinga ang baby mo ng malalim at paulit-ulit niyang ginagalaw ang kanyang mga kamay at paa. Makikita mo ring ginagalaw niya ang ulo niya, tanda na hinahanap niya ang iyong breast para makadede siya.

Kapag talagang gutom na si baby, mapapansin mong mas malalaki na ang mga galaw niya. Nag-iinat na rin siya at humihikab ng mas madalas. Mas active na din ang paggalaw ng kanyang bibig.

Masakit ang tiyan niya

Isa rin sa mga pinakamadalas na dahilan kung bakit umiiyak ang bata ay dahil sa kabag. Isa sa mga pinakamadalas na dahilan nito ay kapag masyadong mabilis dumaloy ang breastmilk mula sa iyong dibdib papunta sa iyong baby. Kapag overactive ang milk letdown mo, mapipilitan ang anak mong lunukin ito nang mas mabilis sa kaya niya. Nagiging dahilan rin ito para ma-overfeed si baby.

Sa kabilang banda naman, nagiging dahilan din ng kabag ang shallow latch. Kapag hindi nakakakuha ng sapat na gatas si baby, lulunok siya ng lulunok, na siyang magiging dahilan para makakain siya ng maraming hangin.

Para maiwasan ito, ugaliing padighayin ang iyong anak pagkatapos niyang kumain. Sa isang 2011 Smart Parenting article, inirekomenda ni Dr. Ina Atutubo na padighayin ang breastfed babies kada lima hanggang sampung minuto ng pagpapasuso, habang kada isang onsa naman ng gatas para sa mga bottle-fed na sanggol.

Isang epektibong paraan para padighayin si baby ay sa pamamagitan ng "bicycle method." Makakatulong rin kung iiwasan mong kumain ng mga pagkaing maaaring magdulot ng gas sa iyo at sa iyong anak. Kabilang riyan ang broccoli, Brussel sprouts, cauliflower, at repolyo.

Importante ring mahanap mo ang tamang feeding position para hindi kabagin si baby. Kailangang laging mas mataas ang ulo ni baby kaysa sa kanyang tiyan para pumunta ang gatas sa baba ng kanyang stomach at umakyat ang hangin taas.

Marumi ang diaper niya

May mga batang sensitibo sa maruming diaper kaya umiiyak sila agad, samantalang may mga babies naman na hindi agad magrereact.

Malimit na dahilan din ng pag-iyak ni baby ang rashes, kaya importanteng mahanap mo ang diaper na hiyang sa kanya.

Nangunguna sa listahan ng mga diapers na gusto ng mga nanay sa Smart Parenting Village ang MamyPoko Extra Dry Pants. Ayon sa kanila, wala itong leak kahit gaano kalikot ang mga bata. Sumusunod naman sa listahan ang Pampers Premium Care Pants na ginagamit naman ng mga nanay bilang overnight diaper. Highly recommended din ng mga nanay ang Goo.N Diaper, Huggies, at EQ Pants.

Nalalamigan / Naiinitan siya

Sinabi ng pediatrician na si Dr. Roman Araullo sa Smart Parenting na ang mga batang edad tatlong buwang gulang pababa ay nangangailangan ng isang extra na layer ng damit. Ang mga bata namang mas matanda sa tatlong buwan ay pwede nang bihisan ng katulad sa kung paano mo dadamitan ang sarili mo.

Mas magandang ugaliing piliin ang mga damit na presko at maluwang para hindi mainitan si baby, lalo na sa klima dito sa Pilipinas.

Gusto niyang magpahawak

Paano kung napadede mo na si baby at nalinis na ang diaper niya pero umiiyak pa rin siya? Baka gusto lang niyang marinig ang boses mo o 'di kaya ay maramdaman ang yakap mo.

Ayon kay Dr. Harvey Karp, M.D. isang pediatrician, maaari mong mapatigil sa pag-iyak ang anak mo sa pamamagitan ng paggaya ng womb environment. Ilan sa mga pwede mong gawin ay ang pagpapatugtog ng white noise, pag-ugoy sa inyong anak, swaddling, at skin-to-skin contact.

Masama ang pakiramdam niya

Mas iritable, clingy, at sensitibo ang mga babies kung masama ang kanilang pakiramdam. Kung iyak ng iyak ang anak mo, hanapin mo ang mga sintomas ng lagnat, rash, pagtatae, o pagsusuka.

Maaaring nag-ngingipin din ang anak mo kaya iritable siya. Para maginhawahan siya at mabawasan ang kanyang pag-iyak, pwede mo siyang bigyan ng mga chilled fruits at veggies kung siya ay edad anim na buwan pataas. Ang pagbibigay sa kanila ng malamig na ngunguyain ay makakatulong para maginhawahan ang kanilang gum area—bonus na lang na masustansiya ang sinisipsip nila. 'Di hamak na mas ligtas din ang mga ito kumpara sa mga liquid-filled teethers na maaaring mabutas.

Ilan sa mga prutas na pwede mong i-chill ang mangga, papaya, carrot, pipino, saging, avocado, mansanas, melon, pakwan, at maging luya.

Overwhelmed siya

Kung masyadong maraming nangyayari sa bahay ninyo o kung nasaan man kayo ni baby, maaari siyang umiyak dahil sa dami ng naririnig at nakikita niya. Ayon kay Dr. Karp, ang ingay at komosyon ay maaaring maka-overwhelm sa mga maliliit na bata.

Para maiwasan ito, huwag munang i-expose si baby sa sobrang ingay at gulo. Kung may mga dadalaw sa kanyang bisita, huwag silang papasukin ng sabay-sabay o sabihan sila ng hindi sila dapat masyadong maingay.

Pagod siya

Kailangan ng mga babies ng mahabang tulog. Kung hindi sapat ang nakukuhang tulog ng anak mo, maaaring maging iritable siya at maaari siyang umiyak nang umiyak. Kung madalas na maantala ang sleep routine ni baby, maaari itong maging dahilan ng kanyang pag-iyak.

Ilang lamang ang mga ito sa mga posibleng dahilan kung bakit umiiyak ang anak mo. Kung hindi pa rin siya tumitigil sa kabila ng pag-address mo sa mga bagay na ito, mas makabubuting sumangguni ka na sa kanyang pediatrician.

Frequently Asked Questions (FAQs) ukol sa pag-iyak ni baby

1. Kailan ko dapat dalhin si baby sa pediatrician dahil sa pag-iyak?

Dalhin si baby sa pediatrician kung ang pag-iyak ay sinasabayan ng mga sumusunod: lagnat, rash, pagsusuka, pagtatae, hindi pagdumi ng higit sa tatlong araw, hirap sa paghinga, o kung may napapansin kang kakaibang behavior. Kung hindi mo ma-comfort si baby kahit na anong gawin mo, magandang ideya na magpakonsulta na.

2. Makakatulong ba ang paggamit ng pacifier para patahanin si baby?

Ayon sa American Academy of Pediatrics, maaaring magdulot ng panandaliang comfort o ginhaw ang paggamit ng pacifier. Ngunit sa kalaunan, ang paggamit ng pacifier ay maaaring magdulot ng mga sumusunod: maaaring mabawasan ang sudden infant death syndrome (SIDS) ngunit maaaring magresulta rin ng dental problems kung gagamitin nang matagal. Maari rin itong magdulot ng nipple confusion sa mga breastfed babies.

3. Ano ang dapat gawin kung ayaw magpa-burp ni baby?

Kung ayaw magpa-burp ni baby, subukan ang iba't ibang posisyon gaya ng pagpapatong sa iyong balikat, pag-upo sa iyong kandungan habang sinusuportahan ang kanyang dibdib at ulo, o paghiga siya nang pahalang sa iyong lap. Pwede mo ring subukang maglakad-lakad habang karga siya para matulungan siyang bumurp.

4. Paano makakatulong ang mga laruan sa pagpapakalma kay baby?

Makakatulong ang mga laruan sa pagpapakalma kay baby dahil nagbibigay ito ng sensory stimulation na maaaring mag-divert ng kanyang atensyon mula sa kanyang discomfort. Ang mga soft toys, teething rings, at rattles ay ilan lamang sa mga laruan na maaaring makatulong, ayon sa Philippine Pediatric Society.

5. Ano ang mga pinakamahusay na paraan para mapatigil si baby sa pag-iyak kapag nasa biyahe kami?

Upang mapatigil si baby sa pag-iyak habang nasa biyahe, siguraduhing komportable siya. Magdala ng kanyang paboritong laruan, panatilihing presko ang sasakyan, at subukang magpatugtog ng calming music. Pwede rin siyang bigyan ng pacifier o pakainin bago ang biyahe para mas komportable siya.

6. Naaapektuhan ba ng aking stress level ang pag-iyak ni baby?

Ang stress level ng magulang ay maaaring makaapekto sa pag-iyak ni baby dahil nakaka-pick up sila ng emotional cues mula sa mga magulang. Kapag stressed ka, maaaring maramdaman ito ni baby at maging iritable rin siya. Mahalaga na maglaan ng oras para sa self-care upang maging kalmado at positive ang iyong energy na nararamdaman ni baby.

Anu-ano ang mga techniques mo para mapatigil sa pag-iyak si baby? May mga naiisip ka pa bang ibang dahilan kung bakit siya umiiyak na hindi nabanggit sa listahan? I-share mo na 'yan sa comments section.