10 Paraan Para Matulungan Ang Anak Na May Autism Na Makakain Nang Tama

Fact-Checked by Ronna Capili Bonifacio

Ang article na ito ay unang naipublish noong Nobyembre 25, 2021. Nadagdagan ito ng updates noong Setyembre 30, 2024.

May mga batang mahirap pakainin, at problema ito dahil nalilimitahan ang nakukuhan nilang nutrisyon para sa kanilang paglaki at paglago. Kaya malaki itong hamon lalo sa mga magulang ng mga batang may autism o autism spectrum disorder (ASL).

Pero bago ang lahat, kailangan mo munang malaman ang dahilan ng pagiging pihikan o picky eater ng anak. Ito ang sabi ni Stephanie Lee, PsyD, isang clinical psychologist, sa artikulo ni Juliann Garey sa Child Mind Institute.

Maaari raw kasing may iniinda ang bata na sakit sa tiyan, o gastrointestinal (GI) problems, sabi naman ni Dr. Joseph Levy, isang pediatric gastroenterologist, sa parehong artikulo. Hindi lang daw masabi ng bata ang nararamdaman, kaya nauuwi sa tantrum ang pagpilit sa kanyang kumain.

Kabilang sa common GI issues ang mga sumusunod:

• Acid reflux
• Constipation
• Eosinophilic esophagitis (EoE), na isang allergic swallowing disorder
• Diarrhea

Isa pa raw dahilan kung bakit mahirap pakainin ang bata ay ang nakasanayan niyang pagu-ugali sa hapag-kainan. Ilan sa mga iyan ang mga sumusunod:

• Pagkagusto sa isang klaseng pagkain lang, tulad ng creamy o di kaya crunchy
• Hirap sa pagnguya dahil nasanay kumain ng malalambot lang na pagkain
• Hindi mapakali sa kinauupuan at nagtatapon ng gamit

Mga paraan para matulungan ang anak na kumain nang tama

Totoong maraming pangangailangan ang batang may austism, at minsan hindi nabibigyan ng kaukulang atensyon ng kanyang magulang ang nutrisyon. Ang nangyayari raw tuloy, ibinibigay na lang ng magulang kung ano lang ang gusto ng kainin ng anak.

May mga suhestiyon ang mga eksperto na puwedeng gawin para maenganyong kumain ang bata.

Alamin ang priority

Imbes daw na pagsabay-sabayin ang goals, mainam na paisa-isa na lang muna. Puwedeng unahin na madagdagan ang kinakain ng bata o di kaya ang mga klase ng pagkain na kinakain niya. Puwede ring iyong mapirmi siya sa upuan habang kumakain.

Hinay-hinay muna

Okay lang daw na magsimula sa paunti-unti kesa biglain ang anak. Kalaunan daw ay matututo at masasanay siya, kaya konting pasenya pa.

Huwag masyadong itulak ang bata

Kung sumubok ang anak na kumain ng isa o dalawang subo ng bagong pagkain, at umayaw na siya. Huwag na raw pilitin dahil ang mahalaga, nasubukan niya. Baka raw sa susunod na pagkakataon, mas maraming subo na ang gawin ng bata.

Magsimula sa level ng bata

Mainam na alamin muna ang kakayahan ng bata at iwasan na isunod sa gusto mo.

Gawing klaro ang expectations mo

Mahalaga rin na alam mo ang gusto mong ma-achieve nang masabi mo rin sa bata ang dapat niyong mapuntahan.

Bigyan ng praise ang bata

Sa tuwing susubok ng bagong pagkain, halimbawa, sabihan mo ang anak na "good job" siya.

Maging consistent, persistent, at patient

Tunay na hindi madali ang lahat, pero malaking tulong para sa inyo ng anak kung hindi ka susuko at magpapatuloy lang.

Maging modelo sa anak

Malaking tulong din daw na tamang pagkain din ang kinakain mo para pamarisan ka ng anak.

Maging handa sa temper tantrum

Hindi rin madali para sa anak na sumubok ng bagong pagkain at kumain pa. Kaya hindi maiiwasan na mag-tantrum siya.

Gumawa ng food journal at poop journal

Para mas masubaybayan ang progress ng anak, makakatulong kung isusulat mo sa notebook o sa laptop ang mga observation mo.

Pagtukoy ng sensory issues sa pagkain

Paano malalaman kung may sensory processing disorder ang anak

Kalimitang nakikita kung may sensory processing disorder ang isang bata kapag ito ay naging toddler, o mula isa hanggang tatlong taong gulang. Maaaring may sensory processing disorder ang bata kung siya ay:

• Hindi pangkaraniwang pag-ayaw sa malakas na tunog, ilaw, o masisikip na sapatos o pananamit
• Kalamyaan o nahihirapan sa pag-akyat ng hagdan o ilang fine motor skills gaya ng paghawak ng lapis o paggamit ng butones

Ang ilang matitinding pag-uugali ay:

• Nagagalit o pagsigaw kung mabasa ang kanilang mukha
• Nagagalit o umiiyak sa tuwing binibihisan
• Masyadong mataas o mababa na threshold sa sakit
• Nabubunggo sa mga dingding o ibang tao
• Paglalagay ng mga gamit na hindi pagkain, gaya ng mga bato o pintura, sa kanilang bibig

Mga sensory-friendly na pagkain para sa mga batang may autism

Narito ang ilan sa mga masustansyang sensory-friendly na pagkain:

Malulutong na pagkain

• Mansanas
• Karots
• Kale chips
• Inihaw na chickpeas
• Mani
• Banana chips
• Niluto na cauliflower

Squishy na pagkain

• Dinurog na patatas o mashed potatoes
• Mangga
• Peanut o almond butter
• Noodles na gawa sa itlog
• Dinurog na saging
• Abukado
• Cottage cheese

Matubig na pagkain

• Yogurt
• Tomato soup
• Potato soup
• Smoothies na gawa sa bahay
• Pureed na mga prutas
• Protein shakes

Malambot na pagkain

• Dinurog na isda
• Whole grain cereals (binabad sa gatas ng ilang minuto)
• Nilutong prutas at gulay
• Scrambled na itlog
• Beans
• Tokwa

Frequenty asked questions ukol sa pagpapakain ng bata na may autism

Ano ang mga specific na pagkain na mas magugustuhan ng batang may autism?

Ang mga bata na may autism ay madalas na nagpapahayag ng malakas na kagustuhan para sa mga pagkain na may tiyak na pakiramdam sa kanilang bibig. May ilan na mas gusto ang mga malalambot at creamy na pagkain tulad ng yogurt, mga sabaw, o sorbetes, samantalang ang iba ay mas gusto ang mga malulutong na pagkain gaya ng mga biskwit o karrots. Ito ay kadalasang nakadepende sa kagustuhan mismo ng bata.

Ano ang mga palatandaan na ang problema sa pagkain ng bata ay dulot ng sensory issues?

Ilang sintomas ng pagkakaroon ng sensory problem ay ang sumusunod:

• Pagbuga ng pagkain habang kumakain
• Pag-ayaw kumain
• Pag-iyak tuwing kumakain
• Pagsusuka
• Pagkahuli sa milestones na may kinalaman sa pagkain
• Kakaibang kagustuhan ng mga lasa o pagkain
• Nalalaglag na pagkain mula sa bibig

Paano malalaman kung ang picky eating ng anak ay isang sign ng mas malalim na health issue?

Maaaring hindi lang picky eater ang isang bata at may mas malalalim na health issue kung siya ay:

• Nasusuka kapag may nakikita, naaamoy, nahahawakan, o natitikman na uri ng pagkain
• May isang uri lang na pagkain na kinakain, gaya ng puro blended na pagkain, o puro malutong na pagkain
• Mas pipiliin pa niya magutom o ma-hospital bago kumain ng bagong uri ng pagkain

Basahin dito para sa sensory-friendly activities na puwedeng gawin sa bahay.