May Paraan Ba Para Lumabas Ang Regla Kung Hindi Naman Buntis?

This article was published on February 17, 2021, and has been updated on July 29, 2024.

Bukod sa pagiging buntis, may ibang mga rason kung bakit hindi nagkakaroon ng menstruation. Mainam na alamin muna ito bago hanapan ng paraan para lumabas ang regla. Baka kasi delayed lang talaga ang dating ng buwanang dalaw.

Bakit ayaw lumabas ng regla?

Tinatawag na amenorrhea ang hindi pagkakaroon ng regla ng isa o higit pang beses na menstrual period. Narito ang ilan sa mga posibleng dahilan ng amenorrhea, ayon sa mga medical experts:

Pagiging stressed

Ayos lang ang konting stress sa buhay, sabi ni Shelley White-Corey, isang clinical assistant professor sa Texas A&M Health Science Center College of Nursing. Pero ibang usapan na kapag humantong na sa chronic stress.

Iyan ang pagiging stressed nang madalas at tumatagal pa minsan. Ang nangyayari tuloy, nawawala ang balanse sa katawan. Nagiging aktibo ang hormone na cortisol at inilalagay nito ang katawan sa survival mode. Isa sa mga puwedeng epekto nito ay ang pagtigil pansamantala ng menstruation.

Sobrang pag-exercise

Bagamat maganda sa kalusugan ang exercise, mas maganda kung huwag bibiglain ang katawan. May epekto kasi ang sobrang pag-e-exercise sa pagbaba ng estrogen level. Ang estrogen ang hormone na nagre-regulate ng female reproductive process.

Kaya nga raw may mga atleta na nakakaranas ng secondary amenorrhea kapag masusi ang kanilang pagsasanay. Ibig sabihin, hindi sila nagkakaroon ng menstruation ng 6 months o higit pa dahil sa rigorous training.

Biglaang pagbabago sa timbang

Kung marami ang nadagdag o di kaya nabawas sa iyong timbang, maaaring maapektuhan ang iyong monthly menstrual cycle. Puwede kasing sangkot dito ang mas malalim na dahilan ng biglaang pagbabago sa timbang.

Baka dahil sa uncontrolled diabetes kaya ka biglang tumaba o di kaya meron kang eating disorders kaya ka naman biglang pumayat. Kabilang sa eating disorders ang anorexia at bulimia. Makakatulong ang pagkonsulta sa doktor para ma-address ang problema mo sa timbang at ang ugat nito.

Biglaang pagbabago sa oras ng pagtulog

Kapag nasanay ka na sa morning shift na pagtatrabaho at bigla kang nalipat sa night shift, posibleng magkaroon din ng pagbabago sa iyong monthly period.

May isang pag-aaral ang nagsasabing may kinalaman ang disruption sa circadian rhythm sa pagiging irregular ng dating ng menstruation. Ang circadian rhythm ang internal body clock na nagre-regulate ng mahalagang cellular processes. 

Medication

Maaaring side effect ang hindi pagkakaroon ng menstruation kung may bago kang iniinom na gamot. Ayon sa Mayo Clinic, kasama sa listahan ang ilang uri ng gamot tulad ng:

• Antipsychotics
• Cancer chemotherapy
• Antidepressants
• Blood pressure
• Allergy medications

Samantala, may mga kababaihan daw na tumitigil ang kanilang menstruation dahil sa birth control medication (pills, injection, IUD). Kahit huminto sila sa pagte-take ng ganoong medication, hindi kaagad bumabalik ang regular ovulation at menstruation.

Problema sa thyroid

Gumagawa ang thyroid gland ng hormones na tumutulong sa pag-control ng maraming vital functions sa katawan. Nagkakaroon ng sakit sa thyroid, kadalasan ang mga kababaihan, kapag nasobrahan (hyperthyroidism) o di kaya nagkulang (hypothyroidism) ang dami ng thyroid hormones sa katawan.

Sa parehong klase ng sakit, maaaring maapektuhan ang pagkakaroon ng menstruation.

Polycystic Ovary Syndrome (PCOS)

Tulad ng problema sa thyroid, ang PCOS ay nagdudulot ng hormonal imbalance. Maaaring maapektuhan nito ang pagtigil ng menstruation. Makatutulong na magpatingin sa doktor para makasiguro na meron kang PCOS. 

Perimenopause

Sa pagtungtong ng edad 40, posibleng magsimula na ang unang yugto ng menopause para sa maraming kababaihan. Tinatawag itong perimenopause, kung saan bumababa na ang estrogen level. Kaya dumadalang na rin ang regla.

May paraan para lumabas ang regla?

May mga kababaihan na malayo pa sa perimenopause at wala namang medical condition, pero sadyang nade-delay o napakakonti ng kanilang period. Nakakahanap sila ng mga paraan para lumabas ang regla mula sa:

Pag-inom ng ginger tea

Pinaniniwalaan na nakakatulong ang luya sa paglabas ng regla o induced period. (Basahin dito ang iba pang benepisyo ng luya sa katawan.)

Paglagay ng turmeric sa lutuin o inumin

Bilang traditional remedy, may kakayahan daw ang turmeric, o tinatawag na luyang dilaw, na balansehin ang estrogen at progesterone levels.

Pagkain ng hilaw na papaya

Ayon sa isang pag-aaral sa India, mayroon ang hilaw na papaya na “quality that can control the contractions of the muscle fibers of the uterus.”

Meditation 

Subok na ng maraming tao ang meditation o yoga bilang pangtanggal ng stress. Nare-relax kasi ang katawan at kaisipan. Ang resulta: gumagaan ang pakiramdam at umaayos ang sistema. Maaaring kasama diyan ang paglabas ng regla.

Kailan dapat kumonsulta sa doktor kung ayaw lumabas ng regla

Ang menstrual cycle ay isang mahalagang aspeto ng kalusugan ng kababaihan. Ang regular na cycle ay isang indikasyon na ang reproductive system ay gumagana ng maayos. Gayunpaman, may mga pagkakataon na maaaring kailanganin mong kumonsulta sa doktor upang matiyak na walang underlying health issues. Narito ang mga sitwasyon kung kailan dapat kang magpakonsulta sa doktor tungkol sa iyong menstrual cycle:

1. Hindi regular ang menstrual cycle

Kung ang iyong menstrual cycle ay masyadong mahaba (higit sa 35 araw) o masyadong maikli (kulang sa 21 araw), maaaring ito ay indikasyon ng hormonal imbalance o iba pang kondisyon. Ayon sa Mayo Clinic, ang pagkakaroon ng irregular periods ay maaaring dahil sa iba't ibang dahilan tulad ng polycystic ovary syndrome (PCOS), thyroid issues, at premature ovarian failure.

2. Matinding menstrual cramps

Ang pagkakaroon ng menstrual cramps ay normal, ngunit kung ang sakit ay matindi at hindi kayang maibsan ng over-the-counter medications, maaaring ito ay sintomas ng kondisyon tulad ng endometriosis o fibroids. Ayon sa American College of Obstetricians and Gynecologists, ang severe menstrual pain na humahadlang sa iyong araw-araw na gawain ay dapat ipatingin sa doktor.

3. Matagal o labis na pagdurugo

Ang menstruation na tumatagal ng higit sa pitong araw o labis ang dami ng dugo (halimbawa, kailangan mong magpalit ng sanitary pad o tampon bawat oras) ay maaaring indikasyon ng menorrhagia. Ayon sa National Health Service (NHS) ng UK, ang sobrang pagdurugo ay maaaring sanhi ng hormonal imbalance, uterine fibroids, o iba pang reproductive health issues.

4. Spotting o pagdurugo sa gitna ng cycle

Ang spotting o pagdurugo sa pagitan ng iyong menstrual cycles ay hindi normal at maaaring indikasyon ng infection, hormonal imbalance, o cancer. Ayon sa American Cancer Society, ang abnormal bleeding, lalo na kung menopausal ka na, ay dapat ipatingin agad sa doktor.

5. Mga sintomas ng Polycystic Ovary Syndrome (PCOS)

Ang PCOS ay isang kondisyon na nagdudulot ng hormonal imbalance at nagiging sanhi ng irregular periods, weight gain, acne, at labis na pagdami ng facial at body hair. Ang pagkakaroon ng mga sintomas ng PCOS ay dapat ipatingin sa doktor para sa tamang diagnosis at gamutan.

6. Menopausal symptoms

Ang menopause ay nagdudulot ng pagbabago sa menstrual cycle, ngunit kung nakakaranas ka ng labis na pagdurugo o spotting pagkatapos ng menopause, ito ay dapat ipatingin agad sa doktor. 

Ang iyong menstrual cycle ay isang mahalagang indikasyon ng iyong pangkalahatang kalusugan. Huwag ipagwalang-bahala ang anumang hindi normal na pagbabago o sintomas. Makipag-ugnayan sa iyong doktor upang matiyak na ikaw ay nasa mabuting kalagayan at upang mabigyan ka ng tamang gabay at paggamot kung kinakailangan.

Frequently Asked Questions tungkol sa mga paraan para lumabas ang regla ng hindi buntis

May mga dahilan kung bakit delayed ang menstruation na wala namang kaugnayan sa pagiging buntis. Narito ang ilang mga karaniwang katanungan at kasagutan patungkol dito:

Q: Ano ang maaaring mga sanhi ng hindi pagkakaroon ng regla kahit hindi naman buntis?

A: Maraming maaaring dahilan kung bakit delayed o wala ang regla. Maaring dahil sa stress, hormonal imbalance, sobrang ehersisyo, sobrang pagbaba o pagtaas ng timbang, sakit sa thyroid, polycystic ovary syndrome (PCOS), o menopause.

Q: Ano ang maaaring gawin para lumabas ang regla?

A: Ang paglalakad o pagsasagawa ng ehersisyo, ano man ang komportableng antas para sa'yo, ay maaaring makatulong. Ang healthy na pagkain, pag-manage ng stress, at sapat na pagtulog ay all mahalaga din. Pero sa mga kaso na hindi parin dumadating ang regla mo, importante na magpakunsulta sa doktor.

Q: Kailan dapat mag-alala tungkol sa hindi regular na siklo ng regla?

A: Kung ang iyong regla ay higit sa 35 araw o kulang sa 21 araw, o kung ikaw ay nakakaranas ng mga malalang cramps, konsultahin ang isang healthcare professional.

Q: Ano ang mga pwedeng kondisyon sa kalusugan na maaaring apektado ng irregular na siklo ng regla?

A: Ang irregular na siklo ng menstruation ay maaaring isang indikasyon ng iba't ibang mga kondisyon sa kalusugan tulad ng polycystic ovary syndrome (PCOS), mga problema sa thyroid, premature ovarian failure, at iba pa.

Q: Ano ang dapat gawin kapag palaging delayed ang regla kahit hindi naman buntis?

A: Kapag palaging delayed ang iyong regla at alam mong hindi ka buntis, ang pinakamahusay na gawin ay magpakonsulta sa doktor. Ang doktor ang makapagbibigay ng karampatang gamutan batay sa iyong kondisyon.

Ang pag-uusisa tungkol sa iyong siklo ng regla ay isang mahalagang aspeto ng iyong pangkalahatang kalusugan. Hindi dapat na ikahiya ang anumang mga katanungan o pag-aalala tungkol sa iyong regla. Ang iyong doktor ang pinakamahusay na tao na makakatulong sa'yo upang matugunan ang mga ito.